Tajki rjany wječor. Něhdźe 30 zajimcow je sej nam do Nowoslic dojěło, zo by sej přednošk bywšeho stotnika Zwjazkoweje wobory Lothara Girschele wobhladawo.
Nimale dwaj lětdźesatkaj je dźensa w durinskim Sangerhausenje bydlacy w nadawku Zwjazkoweje wobory dobrowólnje we wukraju přebywał. Wot meje 2001 bě wón w běhu třoch lět w Bosniskej a Kosowje. Nazymu 2004 bu jako oficěr za wobstaranje a regulaciju škodow w campje Warehouse zasadźeny. Bywši industrijiny skład bu přewažnje wot němskich a nižozemskich wojakow zarjadowany. Po wjacorych zasadźenjach w Kabulu bě Lothar Girschele hač do lěta 2018 zamołwity oficěr w pólnym lěhwje Faizabad w horinach sewjerowuchodnje Afghanistana.
Z mnohimi fotami a impresijemi předstaji přednošowar dźěło a žiwjenje wojakow a oficěrow – mjez nimi běštaj tež katolski a ewangelski duchowny – w zarjadowanymaj lěhwomaj, ale tež žiwjenske poměry a socialnu nuzu domoródnych. Cyłkownje dwaceći króć bě wón w Afghanistanje, tak zo móžeše na wjacorych přikładach nazornje pokazać, kak běchu němscy wojacy pomhali wójnske škody wotstronić a zničene mosty abo dróhi natwarić. Dokumentujo z fotami wobchad na dróhach Kabula abo žiwjenje na bazarach pokaza přednošowar tež chudobu ludnosće a kak jej němscy wojacy z wjacorymi akcijemi pomhachu.
Wosebje zajimawa bě přehladka drasty, kotruž je Lothar Girschele sobu přinjesł. Někotre mějachu swoje wjeselo so w přestawce kaftan woblec. Je to židźana abo wołmjana košla, kotruž noša tam mužojo hač ke kolenam, žonjaca saha hač do kulkow. Dokelž pak přednošowar ženje do wobrónjenych wójnskich konfliktow zapřijaty njebě, njejsu zajimcy pola nas w Nowoslicach wo wójnje w Afghanistanje, kotraž poprawom hižo wot lěta 1978 traje, lědma něšto zhonili.
