Swjatki njedźelu je tołsty křižik pola wšitkich Nowosličanow w kalendrje.
Woswjećimy to naš kóždolětny swjedźeń mejemjetanja. Cyła wjeska zetka so popołdnju na dobru šalku kofeja a na wjesoły, wotměnjaty program wjesnych dźěći. Překwapjenka za wšitkich běše, zo su sej holcy serbsku narodnu drastu zdrasćili (wobraz). Tež Christina Šołčina kotraž je program z dźěćimi nazwučowała, so ju zdrasći. “Takle wjerćimy” su ze staršimi, dźědom abo wowku rejowali a k spěwej “Wódny muž”, skupiny Holaski z Chrósćic, su so rytmisce pohibowali. Přez program wjedźeše Diana Fryčec – Grimmigowa w serbskej narodnej dźěłanskej drasći. Program je kóžde lěto hinaši, kóžde lěto syda nowy směšk, nowa překwapjenka abo nowy instrument dźěsća. Rěkaše hižo, zo Nowosličenjo bórze swójsku kapału zawožić móža, jenož mjeno hišće faluje. Hač gitara, akordeon, pišćałka abo kachon, wšitko je pódla a dźěći maja wjeselo. Wo mejskeho krala so je samo w Nowoslicach dwójce wojowało. Dwójce su w samsnym času mejski štom rabnyli, tak, zo mějachmy dwějoch kralow a dwě kralowni. Frederik Šołta wuzwoli sej swoju sotru Viktoriu za mejsku kralownu a druhi por běštaj Jannik Waury a Marianna Pólkec (wobraz). Po programje je wjeselo přeco bóle stupawo. Překwapjenka, plackowej mužaj, a dźěći so hišce raz tak prawje wucychnowachu. Skakanski hród za mjeńšich, žerdź za waženje a třělanje na cilowu tarč abo zhromadna kopańca “starši napřećo młodym”, běchu popołdnjo wobrubili. Popołdnjo so hišće prawje woswjećeše a wječor so derje wuklinči.
Wutrobny dźak tež na tutym městnje wšitkim wjesnanjam za pomoc a wjesnej radźe za wulkotnu organizaciju. Přichodne lěto zas!
